Unse Wiehnachtsgröten 2022 Audio
Dat Johr geiht to Enn...
un de Lichten verbrennen,
man de Tiet stickt en Licht an in di.
ut „Dat Johr geiht to Enn..“ vun Rolf Zuckowski
Leve Maten,
ok unse Johr mitenanner neigt sik, Wiehnacht is nich mehr wiet. Wi muchen mit düsse Breef unse besten Wünsche för dat Wiehnachtsfest un dat kamen Johr bestellen, Gesundheit un Freden ganz vörnan!
Johrswessel is ümmer ok en Tiet för torüch- un na vörn kieken, för dat Bedenken un Bedanken. Danke, dat Jem/Ju achter uns stahn un unse Arbeit stütten un dregen! Düt Mitenanner gifft uns Knööv. Un wo wi de vunjohr ringeven hebben, dat wüllt wi hier nochmal groff bekieken:
Grüße zu Weihnachten
Die Mitglieder unseres Vereins erhalten diese Weihnachtsgrüße persönlich per Mail oder mit der Post. Um zum einen einem breiteren Adressatenkreis unsere Grüße zugänglich zu machen, als auch die Möglichkeit zu schaffen und zu nutzen unsere Grüße als Audio anzubieten, platzieren wir sie auch in diesem Medium.
Fühlen Sie sich herzlich eingeladen sich unseren Rückblick und Ausblick auf unsere Arbeit vorlesen zu lassen.
Mit den besten Wünschen für ein segensreiches Weihnachtsfest und ein friedvolles und gesundes neues Jahr grüßt herzlich
der
Vereen Plattdüütsch Zentrum Landsdeel Sleswig e.V.
Nie'e Statut
Mit „Drift vun Harten“, as dat glieks bavenöver op unse nie’e Homepage to lesen is, sünd dat Gespann ut Vereen un Zentrum dat Johr 2022 angahn un wi hebben veel beschickt kregen. Dat Vörbereiden vun unse nie‘e Statut hett uns in de Vörstand ok vunjohr noch recht in Anspruch nahmen. So veel duller freut un motiveert uns dat, dat dat op de Johrsversammeln eenstimmig annahmen worrn is.
Fortbillen för Lütt un Groot
As een vun unse Kernopgaven verstahn wi Plattdüütsch na de Lütten to dregen. De Klassiker is dor unse Seminarreeg „Platt för de Lütten“ för Lüüd, wat in Kitas arbeiden. Düt Format hebben wi al vör twee Johr utbuut un laden nu ümmer mal wedder Ehemaligen to en „Lütten-Opfrischer“ in. Anner Johr warrn wi dat eerste Mal miteens en „Lütten-online“-Reeg anbeden, dat de Pädagoginnen un Pädagogen, de dat geern annehmen muchen, mehr Gelegenheit hebben dat Snacken to öven. Dormit se sik sekerer föhlen bi dat Wiedergeven in de Inrichtens.
Ok Groten könen bi uns veel Plattdüütsch mitnehmen. För Lüüd, de al Kurse geven oder dat vörhebben, geev dat en Wuchenenn ünner de Överschrift „Platt lehren lehren“. Dat planen wi nu all twee Johr antobeden. För de Lüüd, wat sülvst eerst noch (mehr) Plattdüütsch lehren muchen, hebben wi bi twee Bildungsurlaube an de Nordsee Akademie ünnerstütt. Ok anner Johr warrt dat wedder en Wuch „Platt-Land-Küst“ (26.-30.06.2023) un en Wuch „Platt-Land-Lüüd“ (13.-17.11.2023) geven.
Lüüd tosamenbringen
Neven dat Anbeden vun Fortbillen is uns dat Tosamenbringen vun Lüüd en besunnere Anlingen. In’t Gespann mit de Kulturknotenpunkt Nord-West un de Nordsee Akademie hebben wi dat eerste platt drift barcamp in de Gang kregen. Mit so en grote Erfolg, dat wi nächstes Johr, an de 25. März 2023, foorts dat nächste maken. Nieschierig worrn? Kiekt mal ünner www.platt.best/platt-leven/alldag/plattdeutsches-barcamp-in-leck.
En anner Runn, mit de wi tosamen al dat twete Mal en Namiddag ünner dat Motto „Friesisch trifft Plattdeutsch“ anbaden hebben, weren de Nordfreesche Vereen un de Nordsee Akademie. Wat wi torüchmellt kregen hebben drift uns nu an wiedertomaken un mit noch mehr Partners un Spraken ut Nordfreesland to de 26. August 2023 wedder na Leck intoladen.
Platt plegen - in't duppelten Sinn
De drütte Veranstalten, de wi hier noch nömen muchen, hett sik ut dat Mitenanner vun mehrere Akteure ergeven, de ganz neeg mit dat Krankheitsbild Demenz to doon hebben. Dorto gifft dat jede Johr en Akschoonswuch un de harr in 2022 in Sleswig-Holsteen dat Thema „Demenz op Platt – Verbunnen blieven“. Sodennig keem dat Plattdüütsch Zentrum in’t Speel un miteens de Plaan to Gang in en grote Gemeenschopsveranstalten en Fierstunn intobetten, in de Pleeginrichtens mit dat PlattHart uttekend warrn. Mehr to düsse grootoordige Dag ünner de Överschrift „Nordfriesland pflegt Platt“ finnt sik op unse Homepage. Op en Deel schall hier aver noch henwiest warrn: An de 21. un 22. März 2023 beden wi för Betreuungskräfte un anner Lüüd, wat in de Pleeg arbeiden, ünner de Överschrift „Platt helpt helpen“ twee enkelte Fortbillen an. Geern anmellen un /oder wiedervertellen!
Anschuven un Toplegen
As Günter Herrmann letztjohrs dat grote P vun unse Vereen kreeg, geev he dat Priesgeld foorts an de Vereen torüch. Dat weer de eerste finanzielle Sprütt för en twete Band mit Leder un en Musical ut sien Fedder. Mehr Stütt geev dat to unse Freud un Dank vun de VR Bank Westküst un de Windparks Bredstedt-Land un Vollstedt, so dat op unse Johrsversammeln de „Nie’e Leder för lütte Lüüd“ rutgeven warrn kunnen, de dat nu bi uns to kriegen gifft. Unse Dank geiht ok an de VR Bank Nord, de uns bi dat Utschrieven vun unse plattdüütsche Kortfilm-Wettstriet PLATTSPOTS, de noch bet anner Johr lopen deit, mit en Spenn holpen hett.
Dat geev noch so veel to vertellen, t.B. dat wi op dat Norden-Festival in Schleswig en Stand harrn un bi Skandalös in Niekarken en lütte Platt-Workshop maakt hebben, dat wi de NDR bi sien Facebook-Akschoon „Wat söken wi?“ ünnerstütt hebben, dat unse Grafiker Plakaten un en Postkoorten-Serie för dat Warven för unse Saak maakt hett – aver dat steiht - wenn nochnich, denn bald - op unse Homepage.
Plattdüütsche Termine vun wiet un siet
Apropos Homepage: In unse Kalenner nehmen wi geern plattdüütsche Termine vun wiet un siet, besunners ut unse Landsdeel op. Laat uns also geern weten, wenn dat wat bekannt to maken gifft. Af un an (un ümmer öfter) wiesen wi över en Rundmail unse Maten ok kortfristig mal op en Anbott hen.
En poor Termine för 2023 noch hier:
20. Januar, 19.30 Vörstellen vun dat Book „Ik heff tohuus en Swien“ vun Hans Wilkens
He weer de eerste, de dat Plattdüütsch Zentrum in Leck stüert hett. Velen vun sien Texten hebben „Schölers leest Platt“-Deelnehmers op dat Podest begleitet. Bidde anmellen bi de Stadtbookladen, Bredstedt, Markt 37
2. März, 18.00 Sozjale Medien för Bangbüxen
Unse Biraatsmaat Steffen Ketelsen kennt sik goot ut un kickt mit uns achter de Vörhang vun Facebook, Instagram & Co. Bidde anmellen bi’t Plattdüütsch Zentrum, Leck,
13. Oktober Johrsversammeln in Horstedt
6. Dezember Wiehnachtsfier in Leck
Nu warrt dat düt Johr aver eerstmal Wiehnachten! Laat in sik en Licht ansteken un sik
hartlich Gröten
Truels Hansen, Vörsitt Vereen
Gesa Retzlaff, Stüer Zentrum