Platt lehren mit Beo - en kinnerlichte App för Groot un Lütt Audio
Beo is swatt, hett en groot geelroden Snipp un kann wunnerbor snacken. De is sogor reglrecht spraakbegaavt, de Vagel ut Asien. De kann nich blots Geräusche namaken, de kann ok Wöör nasabbeln. Un jüst dorüm heet de niege Platt-Lehr-App ok „Beo“. Dat Kompetenzzentrum för Nedderdüütschdidaktik an de Universität Griepswold hett de multimediale un interaktive App tosamen mit verscheden Landschopsverbänn op de Been stellt. De dore Vagel un uns Regionalspraak, de hebbt aver noch wat gemeensom: Se sünd vun’t Utstarven bedroht. Un dorüm is dat wichtig, dor gegenan to stüern. Dorför is so’n App dat richtige Middel – besünners för junge Lüüd: Modern, perfekt mit dat Handy to bedenen, barrierefrie mit Audiodateien to’n Toluustern un mit all de Themen, de uns in‘n Alldag över’n Weg lopen doot. Un se is regional veelfolig – denn Beo hett twee Spraakverschonen praat: Westnedderdüütsch un Oostnedderdüütsch.
So süht dat Startbild vun de Platt-Lehr-App ut.Lesen, hören, verstehen, wiederholen - so macht Sprachenlernen Spaaß
„Platt mit Beo“ ist eine kostenfreie Sprachlern-App, die das Kompetenzzentrum für Niederdeutschdidaktik der Universität Greifswald zusammen mit mehreren niedersächsischen Landschaftsverbänden entwickelt hat. Ihren Namen hat sie vom Beo. Dieser asiatische Vogel ist sehr sprachbegabt und – genau wie die Plattdeutsche Sprache – vom Aussterben bedroht. Die multimediale und interaktive App gibt es in zwei Sprachvarianten: Westniederdeutsch und Ostniederdeutsch. Damit werden regionale Sprachvarietäten im gesamten norddeutschen Raum abgedeckt. Die App kann kostenlos heruntergeladen werden und bietet verschiedene Übungen zum Sprach- und Hörverständnis sowie zur Rechtschreibung und zum Lesetraining.
Mutlimedial un interaktiv dörch de plattdüütsche Welt
De niege Platt-Lehr-App „Beo“ is en Kinnerspeel för Groot un Lütt. Se is multimedial un interaktiv. Dat geiht nich blots üm dat Lehren un de Utspraak vun Wöör, dat geiht ok dorüm, plattdüütsche Texte to verstahn. Hier dreiht sik all’ns üm dat Leesverständnis, Höörverständnis, üm dat richtige Schrieven un de richtige Utspraak. Dor steekt ok dree Johr Arbeit binnen un de Tosamenarbeit twüschen de Uni Griepswold un de Landschopsverbänn un Lannschopen in Neddersassen is eenmalig.
Över 4200 Audioopnahmen gifft dat nu al bi Beo. Natürlich ok de passen Grammatik un en Vokabel-Markfunkschoon. In teihn verscheden Lekschonen geiht dat üm all’ns, wat de Dag so mit sik bringen deit: to’n Bispeel Eten un Drinken, bi’n Dokter, op Reisen, bi’t Inköpen oder wat een in de Freetiet maken kann.
To jeedeen Rebeet gifft dat verscheden Öven
To jedeen Rebeet gifft dat verscheden Öven – mal geiht dat in de lütten Texte üm’t Konjugeren, mal muttst du richtig lesen, üm de Antwoort to finnen, mal muttst du versöken, de hoochdüütschen Riemels mit plattdüütsche Wöör to översetten. De sünd denn aver vörgeven un jeedeen richtige Woort warrt di ok vörleest. So geiht eenfache Lees- un Höörverständnis mit de richtige Rechtschrieven tosamen. Un is wat verkehrt, denn warrt dat even nochmal wedderhaalt.
Un wenn du di dor dörcharbeidt hest, denn kriggst du op jeedeen Siet glieks vun Beo to weten, ob all’ns richtig is: Is he tofreden, den juchheit he mit en Piepton, is he nich inverstahn, denn gnaddert he as so’n olen Motor. Büst du goot dorför, denn kannst du ganz vele Punkte, nee, blau-sprenkelte Eier sammeln un denn büst du an‘n Sluss de Platt-Expert*in. Dat is Spraak lehren bi’t Spelen . . .
Spraakgeschicht, plattdüütsche Literatur un vele Infos to unse Regionalspraak
Nu gifft dat aver ok Lüüd, de künnt Platt nich blots verstahn un snacken, de wüllt ok geern mehr över uns Regionalspraak weten. Un ok dorför is Beo de perfekte App: Dat gifft passen Informatschonen över de Europääsche Charta vun de Regional- oder Minnerheitenspraken in Europa, över verscheden Platt-Institutschonen, du kannst wat över de Spraakgeschicht lehren un över de plattdüütsche Literatur vun’t achte bet to dat 21. Johrhunnert.
Wenn du nu mööd büst na all de Lekschonen, denn günn di mal en Speel. Beo kann mit di sogor Memory un Quartett spelen. Aver dat Allerbeste kümmt to’n Sluss: Düsse Platt-Lehr-App kann een ganz ümsünst in‘n App-Store rünnerladen.
In teihn Lexen lehrst du mit Beo Platt - un mit de Vagel maakt ok Grammatik Spaaß!
Tellen, lesen, tosamen söken - dat geiht allens mit düt Speel in de App.