Wikipedia gifft dat in 309 Spraken  - ok op Platt

De Internetsiet steiht op Platz söven vun‘e „top sites“ op’e Welt – glieks na google, youtube, ebay un amazon. De düütsche Wikipedia tellt intwüschen över 2,5 Millionen Artikel to meist jedeen Thema. Dat stell en sik mol vör: Dor steekt 1500 Bänne vun‘ Brockhaus binnen. Kuum to glöven. „Kostenloses Wissen für alle“ – heet dat Prinzip. Denn jedeen kann an dat Lexikon mitschrieven. Un dat in 309 Spraken. Ok op Plattdüütsch.  „Dat fre’e Nakieksel“ is siet 2003 online. 82.972 Artikel hebbt de flietigen Plattschnacker all schreven. En dorvun is „Slomox“ – de in’t richtige Leven Marcus Buck heten deit. He hett dat Nakieksel twoors nich mitgrünndt, aver he hett dat mit opbuut un is hüüt en vun’e Administratoren.

Mit en Handvull Schrievers füng dat an – en weer Slomox

„Dor weer en, de hett sik plattmaster nöömt“, besinnt sik de Schrieversmann ut’n Landkreis Stade, „de hett dat Ganze in de Gang bröcht. Ik sülven bün eerst 2005 dorbi kamen. To de Tiet weern wi man blots en Handvull Lüüd.“ Dat is ok hüüt noch so, beduert de Plattschnacker, de mit de Spraak groot worrn is: „Ik bün bi Oma un Opa in’t Huus opwussen. De hebbt jümmer Platt mit mi schnackt.“ Man de Lüüd in sien Öller, de schnackt hüüttodaags keen Platt mehr. „As ik anfungen bün to schrieven, dor müss ik mien Plattdüütsch eerst mal so’n beten oppoleren.  Ik müss mi dor  eerst langsam rantasten. Ik weer dat jo nich wenndt, Platt to schrieven“, vertellt de 38johrige. „Dor musst du di eerst Mol rinfinnen in de Rechtschrieven.“

Söss bit sövendusend plattdüütsche Artikel hett Marcus Buck all schreven

Anfungen is he aver op de hochdüütsche Wikipedia: „De Idee vun Wikipedia is jo, dat kumplett Weten vun’e ganze Welt in een Nakieksel rintokriegen un dat all’ns optoschrieven un to sammeln. Dat hett mi faszineert – unabhängig vun Platt.“ To Anfang hett em dat ok noch goot gefullen.  Aver denn geev dat jümmer mehr Striet un sinnlose Diskuschonen. „Op de hochdüütsche Wikipedia, wenn du dor de eersten Artikels schriffst un dat is nich 100prozentig na de Regeln, denn kann dat angahn, dat de di orntlich wat seggt. Op de Plattdüütsche Wikipedia, dor weer dat so’n beten familiärer. Dor hett dat ok af un to mal Striet geven, aver dat weer even anners“, besinnt sik Marcus Buck. Un dorüm schrifft he nu siet över föfftein Johr för dat Nakieksel: „Ik heff anfungen mit mien Heimatdörp. Un vun dor heff ik mi denn so bilütten na de Naverdörper un de Landkreise wieder arbeidt. Dat warrt wull  so söss bit sövendusend Artikel, de ik dor schrieven mutt – aver de sünd noch lang nich trecht. Ik arbeid mi vun binnen na buten.“ Un buten, dat is ganz wiet weg. Un nu kaamt wi wedder op „Belice“ to snacken.