Winter in de
Lütthasenschool Audio
Wokeen kennt nich dat wunnerbore ole Kinnerbook „Die Häschenschule“? De Geschichten vun de lütten Hasenkinner in de Hasenschool sünd to üm to sööt. Albert Sixtus (1892–1960) hett düsse fidelen Riemels vör knapp hunnert Johr to Papier bröcht. De fienföhlig Biller kaamt vun den Illustrator Fritz Koch-Gotha (1877–1956). Över twee Millionen Böker sünd dorvun över den Ladendisch in de Kinnerstuven rinwannert. Vör teihn Johr hebbt de lütten Hasenkinner denn ok endli Plattdüütsch lehrt. Karl-Heinz Groth hett de hochdüütschen Riemels in’t Plattdüütsche överdragen. De „Lütthasenschool“ is dorbi rutsuert. Nu beleevt de Hasenkinner Hans un Greten endlich wedder nie'e Aventüer op Platt un passend to de Johrstiet heet dat Book: „Winter in de Lütthasenschool“. Dat is wat ganz Besünneres, denn düsse Geschicht vun Albert Sixtus is nu eerst opdükert. Se leeg mit veele anner Verse op’n Dackböhn rüm.
Foto: Heike Thode-ScheelWenn die kleinen Hasen Weihnachten feiern
Wer kennt sie nicht, die süßen Bücher "Die Häschenschule"? Der Kinderbuch-Klassiker von Albert Sixtus ist fast 100 Jahre alt. Vor zehn Jahren haben die Hasen Platt von Karl-Heinz Groth gelernt. Er hat die Bilderbücher übertragen. Nun gibt es eine neue Geschichte, die lange auf dem Boden eines alten Hauses versteckt war: "Winter in der Häschenschule" - auch auf Platt.
Julia Walther hett nie'e Biller maalt
Leider geev dat dorto keen Biller mehr. Also hett de junge Illustratorin Julia Walther enfach niege maalt – ganz so, as wi dat vun fröher kennt. Un jüst so leeftalig as de Originolbiller vun Fritz Koch-Gotha. Aver doch noch en beten söter un moderner. För allen Dingen de Schoolmeister is nu gor nich mehr so scharp antosehn:
„Morrn Kinner, fangt de Ferien an,
denn Knecht Ruppert löppt nu weer
dörch den Hasenwoold verdweer . . .“
röppt he in’e Hasenschool. Un denn geiht dat heißa in’t Winter-Vergnögen rin. Eerst Mol to’n Sledenfohrn in‘ Winterwoold. Un denn kleevt Hasengretel in’e Köök Christboomsteern tosamen un Hasenhansel maakt all de Nööt güllen. Nu is Wiehnachten nich mehr wiet.
Af in't Hasen-Winter-Wunnerland!
Karl-Heinz Groth nimmt uns mit op en Reis dörch dat Hasen-Winter-Wunnerland. Wo de Kerzenlücht in de Nacht blenkert, de Steerns in güllen Pracht hell lüchten un denn eerst de „glinstern Lichterboom“ . . . Wo schön klingt doch de plattdüütschen Verse. Dor kümmt en so recht in Wiehnachtsstimmen. Annern Morrn is natürli Äkschen in‘ Winterwoold. Dor suust de beiden Hasenkinner op ehr niege Holtskier den Barg rünner. Un glööv man nich, dat se en Sneemann buut. Ne, natürli buut de beiden en Snee-Haas:
„Hier en Tappen för de Gummel,
för Mund un Ogen Kerzenstummel,
op den Kopp twee rode Wuddeln,
fardig is he -recht to’n Knuddeln.“
Tja, aver jichtenswann sünd denn de Wiehnachts-Ferien ok to Enn. Aver de Lütten mööt nich trurig ween, denn:
„Blots noch veerteihn Weken lang,
mööt drücken jüm de Hasenbank,
un denn is Oosterdag. Hurra . . .“
juchheit de Hasenkinner. Un wat kümmt denn? Na, is doch kloor:
Jedeen Hasenkind vun’t Land,
nimmt en Pinsel in de Hand,
farvt de Eier, witt un rund,
mit’e schönsten Farven bunt.“
Winter in de Lütthasenschool
Albert Sixtus, Platt vun Karl-Heinz Groth
Husum Verlag
Bestellnummer ISBN 978 3 967 170 5
12,95 Euro
So süht dat niege Book vun de lütten Hasen binnenin ut.
Albert Sixtus hett de söten Geschichten för sien Söhn schreven.