Mit Drift! Online-Serie över Lüüd ut Sleswig-Holsteen Audio
Lüüd mit Drift – dat sünd Minschen, de för ehr Saak brennt, de Füer un Flamm sünd för ehr Profeschoon, för ehr Ehrenamt oder för ehr Hobby. De jümmers niege Ideen hebbt un de keeneen stoppen kann, wenn dat üm ehr Saak geiht. Jüst solke Lüüd hett de NDR nu online in en niege Serie vörstellt: „Mit Drift!“ heet de kort un bünnig. Middewiel gifft dat söven Films in de Mediathek antokieken. Un dat is bannig spannend, denn dat sünd heel ünnerscheedlich Lüüd: De Noothölp-Sanitäterin Nane Hansen, de Musiker Thomas „Gerri“ Christiansen, „Werner“-Tekner Brösel alias Röttger Feldmann, Springrieder Tjade Carstensen, de Evolutionsbiologin Christine Ewers, Kutterpuller Marcus Usadel un Plattsnacker, Buddhist un Trainer Jan-Ole Hoffmann. Se sünd all ganz verscheden, aver dree Saken hebbt se gemeen: Se kaamt all ut Sleswig-Holsteen, se snackt all Platt un se hebbt all böös Drift.
Online-Serie über Menschen aus S-H mit Ideen un Leidenschaft
"Mit Drift! Lüüd mit Ideen" – ist eine neue Serie im NDR-Onlineformat. Natürlich op Platt. Der NDR besucht Menschen, die für ihren Beruf, für ihr Hobby oder ihr Ehrenamt brennen. Die mit Leidenschaft arbeiten und neue Ideen entwickeln. So wie die Rettungs-Sanitäterin, Influencerin und Unternehmerin Nane Hansen oder der Musiker und Songwriter Gerri Thomas Christiansen. Beide kommen aus Bohmstedt in Nordfriesland und beide engagieren sich nicht nur leidenschaftlich für ihren Beruf, sondern auch für die plattdeutsche Sprache. Sieben Folgen gibt es bisher. Mit dabei auch Springreiter Tjade Carstensen, Jan-Ole Hoffmann, der Comic-Zeichner Brösel, Evolutionsbiologin Christine Ewers und Kutterpuller Marcus Usadel.
Nane Hansen – Cool blieven, ok wenn’t brennt
So as Noothölp-Sanitäterin Nane Hansen ut Bohmstedt in Nordfreesland. „Ik bruuk den Nervenkittel. Wo man nich weet, wat kümmt“, seggt de Plattsnackerin. Cool ween, ok wenn’t sotoseggen brennt, dat kann se. In de Noothölpstatschoon Eggebek maakt se mit ehren Kollegen Jarne Deenst. De mutt ok so männichmal herholen för Nanes Reels bi Instagram. Ok so en Idee vun ehr – de Arbeit as Noothölpsanitäterin mal vun de fidele Siet to vertellen. Denn ehr Arbeit is al eernst noog un „en krasse Erfohren“, meent Nane. Wenn dat Martinshoorn angeiht, denn geiht dat oft üm Leven un Dood. Se kann dor goot mit üm. Ok wenn dat männichmal to laat is för’t Hölpen. Dormit aver de Lüüd ok tohuus eerste Hölp leisten künnt, gifft Nane ehr Weten wieter. Se hett sik sülvststännig maakt mit Eerste-Hölp Kurse: „Erste Hilfe – Dein Wissen kann Leben retten“. Middewiel höört al teihn Lüüd to ehr Team un ehr Kurse gaht weg as warme Semmeln. De Lüüd möögt ehr Oort, Weten to vermiddeln. Locker, flockig, cool. Dat is Nane. Un se hett jümmers Ideen un Drift. Un wenn de Kopp mal to vull is, „un oprüümt warrn mutt“, denn geiht se mit ehren lütten Söhn direkt an’t Water. Achter’n Diek bi Lüttmoorsiel. Dor lett se sik den Wind üm de Nees weihen för niegen Drift.
ARD-Mediathek - Noothölperin/Ünnernehmerin/Influencerin Nane Hansen
Wenn ik Musik maak, denn in mien Modderspraak
Jüst so geiht dat ok Musiker Thomas "Gerri" Christiansen vun de plattdüütsche Band „Aalkreih“. Wenn de mal verpussen mutt vun siene Kunzerte oder vun sien Arbeit bi de Folk-Baltica, denn geiht he an’t Water to’n Flegenfischen. „Ik bün jo ok sünst en beten unruhiger un dat kann ik hier ganz goot utblennen“, meent de plattdüütsche Jung ut Bohmstedt in Nordfreesland. Mit twölf hett he sien Computer gegen en E-Gitarr tuuscht un denn Punk-Musik maakt. Sien Modder hett de Wahnstuuv utrüümt, dormit Gerri dör öven kunn. „Dat weer so’n Drang“, meent he. De Hardcore-Band hett de Musiker un Naver vun Knut Kiesewetter jichtenswenn to Siet leggt – un sik op sien Heimat besunnen. Vele Texte sünd denn ok op Noordfreesland toschreven. Kloor weer för em damals ok: „Wenn ik Musik maak, denn in mien Modderspraak“. Denn Plattdüütsch hett för em en ganz anner Farv in de Musik as Hochdüütsch. Siet 2013 steiht Gerri mit sien Band „Aalkreih“ op de Bühn. Mit sülvstschreven Texte, de vun Noordfreesland vertellt un vun de Lüüd bi em tohuus. Blangenbi is de Musiker aver ok noch Vadder vun twee Lütten un dat is gor nich so eenfach, allens ünner een Hoot to bringen: Familie, Kunzerte, Proven, sien Arbeit bi de Folk-Baltica un sien Hobby. Glücken deit dat blots, wenn en noog Drift hett. Un dat hett Gerri, meent sien Fründ Momme: „He is en Pulverfatt.“
ARD-Mediathek - De Mann mit dat Gitarrenbajo un de Flegenruut Gerri Christiansen
En Barg Drift un jümmers op’n Sprung na baven – dat is Springrieder Tjade Carstensen. De junge Noordfrees is jüst so peerverrückt as sien hele Familie. De hett siet över 50 Johr en grote Peerhoff in Sollwitt. Dree Generatschonen – een Hoof, een Leev to de Peer. Mit dorbi sünd sien Opa un Oma, Vadder un Modder un sien twee Süstern Teike un Beeke. Dat weer vun Anfang an Tjades Droom, Peerweert to sien: „Ik heff mien Hobby to mien Beruf maakt un de Beruf is mien Leidenschaft.“ Un so steiht he meist jeedeen Morgen „mit vulle Motivatschoon“ op. Sien Hart sleit för de Arbeit mit de Deerten: „Ik seh mien Peer nich as Sportgeräte, sünnern as beste Frünnen.“ Un an jeedeen niege Peerd mutt he sik rantasten. Blots so schafft he all de Erfolge op de Turneren. Un natürlich is dor ok noch de Drift vun de Tokiekers. „Atemberaubend“ finnt de junge Springrieder düt Geföhl, wenn dat Publikum bi jeden Sprung mitfevern deit. Un de Drift ut sien Familie, de heel un deel achter em steiht. Op nu op de Turneren oder Tohuus. De geevt em Stütt un Stöhn, wenn’t mal nich so lopen will. Tjade Carstensen sitt fast in‘ Sattel un is jümmers vörn op‘n Sprung un achter in‘n Galopp.
ARD-Mediathek - Tjade Carstensen leevt för de Peersport
Noch mehr Lüüd mit Drift gifft dat in de NDR-Serie to sehn – enfach mal rinkieken! Dat lohnt sik. All Folgen in de ARD-Mediathek - Mit Drift! Lüüd mit Ideen
Noch mehr Platt bi de NDR: www.ndr.de/platt
För Tjade Carstensen gifft dat nix Schöneres, as un sitten jeden Dag op't Peerd. He hett sien Hobby to sien Beroop maakt un mischt in de Springsport ganz baven mit.
Nane Hansen brennt för ehr Arbeit in de Nootfalldeenst un ehr egen Ünnernehmen. Se deelt ehr Drift un weten ok fliedig op Instagram ünner: erste_hilfe_nf.
Gerri Christiansen sien Dag kunn goot en poor Stunnen mehr hebben, dat he sien Arbeit, Hobby un dien Familie ünner een Hoot kriggt - löppt liekers!