Endlich wedder Theaterdaag - so weer dat in Molfsee Audio
Wat weer dat för en waagten Optakt vun de 29. Plattdüütschen Theoterdaag in’t Freilichtmuseum Molfsee: Live-Theoter mit Film-Theoter tosamen. Dat hett dat noch nienich geven. Aver „De Jungen Lüüd ut Löwenstedt“ hebbt dat mit Bravour hinkregen. „In de Juni geev dat immer Erdbeeren“ – dat Stück hett Birgit Bockmann de Löwenstedter sotoseggen op’t Liev toschreven. De Idee: Dat Thema Flucht mol ut en anner Perspektive to wiesen: Martin mutt ut Sleswig-Holsteen mit sein Familie flüchten – un lanndt jichtenswo in en ganz anner Kultur. „Dat mööt wi ju nu mol tomoden“, hett Gesa Retzlaff vun‘n Bühnenbund Sleswig-Holsteen de Toschauer wohrschuut. Steffen Ketelsen weer Martin un hett live op de Bühn speelt. Twüschendörch hebbt se de enkelten Szenen mit all de annern Schauspeler*innen as Film wiest. Güng nich anners vunwegen Corona. Dat Publikum weer deep anröhrt.
Fief Bühnen harrn siet de letzten Theaterdaag (2019) jemehr 100-johrige Jubiläum: Itzehoe, Kiel, Lübeck, Flensburg un Glückstadt. De Bühnenbundsgemeenschop ehrt un graleert de Jubilare to'n Optakt vun dat Festival.Rückblick auf die Niederdeutschen Theatertage 2022 in Molfsee
Nachdem in den vorherigen beiden Jahren aufgrund der Beschränkungen im Zusammenhang mit der Corona-Pandemie die jeweils vorbereiteten Theatertage abgesagt werden mussten, freuten sich alle Beteiligte umso mehr, dass das jährliche große Treffen der Mitgliedsbühnen aus dem Niederdeutschen Bühnenbund durchgeführt werden konnte.
Eine ausführliche Nachberichterstattung findet sich in der Juni/Juli-Ausgabe des Infoblattes. Besuchen Sie dazu die Homepage des NBB S-H www.buehnenbund.com.
Friedag, 13. Mai: Freitag der 13. för de Rendsborger
Tja, dat weer nu so’n echten Freitag, der 13. . . . denn een vun de Bühne Rendsborg hett Corona kregen un se kunnen ehr Stück „Single, 66, söcht . . .“ nich spelen. Dorbi harrn se sik so freut, endlich mal wedder op de Bühn to stahn na all den Coronamist. Ersatz müss her: Stefi Steup mit ehre Danzdeerns sünd denn ganz flink insprungen. Dor weer Stimmung in de ole Winkelschüün in Molfsee. De plattdüütschen Deerns hebbt de Bühne rockt mit Gassenhauer un Ohrwürmer un ehr egen plattdüütsche Texte. Un natürli mit ehr Sabbeln vun all'ns, wat en so passeern kann in‘ Alldag. Steffi hett de Lüüd düchtig inheizt un wenn dor nich so vele Stöhl in'n Weg west weern, denn harrn de Lüüd wiss noch anfungen to danzen.
Sünnavend, 14. Mai: Vun Leevs- un Mordlust
De Preetzer Bühn is to Gast mit de swatte bittersööt Komödie "Lüttje Eheverbreken". Claudia Siemsen un Andreas Lüdtken hebbt so mankeen in‘t Publikum in’t Grüveln bröcht. Hett Lisa nu ehrn Mann ümbringen wullt? Oder is he de Trepp rünnerfullen? Hett Jan würkli bi den Sturz sien Gedächtnis verloorn oder flunkert de sik ok wat tosamen? En beten wat vun Leevslust un Mordlust, vun Lögen un Vertruun. Dat Stück vun Éric-Emmanuel Schmitt hebbt de Twee mit richtig veel Leven füllt. Dorför geev dat ganz langen Bifall.
Sünndag, 15. Mai: En Amüseer-Namiddag
De Nedderdüütsche Bühn Elmshorn un „De jungen Platten“ hebbt dat Publikum amüseert. De Jungs un Deerns künnt wunnerbor Plattdüütsch snacken un hebbt ünner dat Leit vun Gerd Richert un Elsbeth Kruse Döntjes un Sketche wiest. Achterran geev dat noch mehr to'n Lachen bi den Schwank "De Apenbarungseid". Un in de Paus geev dat lecker Koffi un Koken.
Dunnersdag, 19. Mai: En Herd un en Fru
En Herd un en Fru op de Bühn. Un natürli de Wand, mit de se ümmer schnacken deit, wieldatt ehr Mann na 20 Johr Ehe keen Lust mehr op Tohöörn hett. Un jedeen Dag steiht Bella an‘ Herd un dröömt vun en Glas Wien an’t Meer. Un besinnt sik op beter Tieden, de dat ok mol geven hett. As Se noch verleevt weer un as de Kinner lütt weern un as dat noch wat to schnacken geev. Bella (wunnerbor speelt vun Sonja Weber) lett ehr Leven Revue passeern. Mit all de Minschen, de ehr in’e Mööt kamen sünd. Un optletzt sitt se tatsächli an’t Meer uni s sik wiss: Ik bün Bella Butenschön un ik bün wat wert. Deepdinkern un gespannt seet dat Publikum dor in de Winkelschüün. Sonja Weber hett dorför groot Bifall mit na Huus nohmen.
Fridag, 20. Mai: Twee narrsche Frünn
Twee Mannslüüd, twee Betten, Disch un Schapp. Dat is dat niege Tohuus vun Elling un Kai Uwe. De sünd jüst ut'e Psychiatrie rut - un warrd nu in't echte Leven rinsmeten. Nu hebbt se twaars en egen Wahnung, aver keen Ah-nung, woans se den Alldag wuppen schüllt. De en tüdert sik Levens-Geschichten torecht, de anner is all bang, wenn dat Telefon bim-melt. De Nedderdüütsche Bühne Kiel weer to Gast mit dat Stück „Elling“. Markus Laurenat un Ulli Thode hebbt de beiden narrschen Mannslüüd as echt speelt. Mol liesen un vull Bevern, mol opsternaatsch luud un vull Dull-heit. Vun't Publikum geev dat dorför överlangen Bifall.
21. Mai: Dree Mann an de Küst
Dree Mann an de Küst - un alle dree tüdelt sik wat tosamen. De en is en Millionär un gifft sik as armen Schlucker ut, de anner is en armen Schlucker un warrd as Millionär ansehn un de drütte is blots de Deener un mutt dat verdreih-te Speel mitspelen. sik wat tosamen. De Nedderdüütsche Bühne Ahrensborg hett dat Verwirrspeel in't Grandhotel Wellenblick op't Best präsenteert - nich blots de Schauspele-rinnen un Schauspeler in ehr verscheden Rul-len, ok dat besünners schöne Bühnenbild hett de Toschauers Lust op en fidelen Avend in't Luxushotel op Amrum maakt.
22. Mai: En lütt Huus in‘n Snee
Bi den letzten Dag vun de 29. Nedderdüüt-schen Theoterdaag in Molfsee bruusde de Sneestorm dörch de ole Winkelschüün. Denn de Nedderdüütsche Bühn Niemünster weer mit de achtersinnige Komödie „Dat lütte Huus in'n Snee“ to Gast. Un iesekoolt weer dat in’t Stück vun Renate Wedemeyer nich blots bu-ten vör de Döör, ok binnen weer de Stimmung mankeen Mol iesig. Wenn twee Paare in en lütt Huus tosamen insneet warrd, denn geiht dat mankeen Mol hooch her. Denn kaamt eerst de richtigen Probleme op'n Disch. Denn warrd Kloortext schnackt. Un dat hebbt de Schauspelerinnen un Schauspeler so richtig goot hinkregen. Dat Stück hett 2019 den Konrad-Hansen-Pries wunnen. To Recht - dat funnen ok de Toschauers, de örnli ap-plaudeert hebbt. Un denn heet dat: Inpacken. Nich blots för de Nedderdüütsche Bühne Niemünster . . .
Anpacken, inpacken un denn af na Huus
De Niemünsteraner weern achter de Bühn all an’t Inpacken un vör de Bühn güng dat denn ok rund. Kloor Schipp maken in de Winkelschüün: Gerd Finke un sien Fru Doris hebbt de Technik afbuut un all den Kraam, de dorto höörn deit, de schönen warmen Deken müssen in Boxen rin un all’ns, wat en vörher rinsleept hett, müss wedder mit na Huus.
Biller to de Stücken ankieken un regelmäßig lesen vun dat, wat an de Bühnen ut den Bühnenbund in't Land los is, köönt Se in dat Infoblatt. Klickt Se op den
Link na de Infoblääd vun den Nedderdüütschen Bühnenbund Sleswig-Holsteen e.V.
Wenn Se dat Blatt jeden Maand mit en Mail tostüert hebben muchen, denn mellt Se sik över dat
Kontaktformular vun den Bühnenbund.
HIer noch en poor Indrück vun den Optakt:
To'n Optakt noch in warme Besökerkledaasch, den annern Avend in Glitter op de Bühn to "sabbeln singen un danzen": Steffi Steup besnackt mit Gerd Finke de Bühnentechnik för sik un ehr Danzdeerns.
Bi dat Live-Theater mit Filmsequenzen harr Techniker Simon Hansen vun de Junge Lüüd ut Löwenstedt bannig veel to regeln.
De NDR live mit den Ü-Wagen vör de Winkelschüün – un Platt-Reporter Lornz Lorenzen jümmers mit sien Mikro ünner de Lüüd. Tolle Berichte un Interviews (hier mit Regisseurin Birgit Bockmann) in’t Radio un in’t Internet.