Stell di bidde kort vör:

Ik kaam vun Pellworm. Dor bün ik in mien Öllernhuus geboren un groot worrn mit veer Geschwister. Mit mien Fru Anne föhr ik de Kroog „Unter den Linden“ – de Naam kummt vun de teihn groten Linnen vör de Döör. Wi hebbt dree Kinner, twee Deerns un een Jung. De dree sind all lang op Fastland in Husum un Hamborg.

Wat bedüüt di de plattdüütsche Spraak?

Ik bün mit Platt opwussen – Hoochdüütsch weer in de School mien eerste Fremdspraak. Wi snacken in de Familie un mit unse Frünnen un Navers egentlich blots Platt. Ok unse Kinner snacken bi’t Huus Plattdüütsch, bi jerde Frünnen un Mitschölers is ok mal en Hochdüütsche dorbi.

Wo kriggst du hüüttodaags Plattdüütsch mit?

Plattdüütsch is op Pellworm noch ganz sülvstverständlich in de öffentliche Ruum. Dat Hochdüütsche warrt avers ok bi uns mehr, wegen dor en ganze Dutt Totrockenen keen Platt verstahn oder snacken. En Deel gifft sik avers Möögde, dat tominnst to verstahn oder in Plattkurse to lehren.

Wie hest du de Vereen kennenlehrt?

Ik wuss vun de domalige Fördervereen, hüüt Dregervereen, vun dat Plattdüütsch Zentrum ut mien Tiet as Pellwormer Börgermeester un Afordnete vun de Landdag in Kiel. Dat ik nu in de Vörstand mitmaak un sogor Vörsitter worrn bün, heff ik mien Vörgänger Truels und besünners Gesa to "verdanken“. Dat bringt richtig Spaaß, mit Vörstand un Biraat vun unse Vereen för dat Plattdüütsche to wogen.

Wat wünscht du di för de plattdüütsche Spraak?

Ik wünsch mi noch mehr Moot, Plattdüütsch in de Alldag to snacken. Vele Minschen köönt dat tominnst verstahn oder hebbt ok dat Snacken noch drop. Unse Kampagne „Ruut mit de Spraak“ hett dorför genau de richtige Punkt sett – un dat „lüttje P“, de sülverfarven Pin to ansteken, is en sichtbore Teken dorför. Wi bruken verlatige Strukturen, de dat Plattdüütsche in de Tokunft dregen, ob in Kitas, Scholen oder annerwegens. Un dorför bruken wi Stütt vun all Sieden.