Stell di bidde kort vör:

Boren un opwussen bün ik in Ollerup in Noordfreesland. Na de School in Viöl stunn de Utbillen bi de Spoorkass in Husum an, dor bün ik 48 Johr lang bleven. So bummelig 10 Johr heff ik Stadtleven utprobeert, in Husum un för de Wiederbildung ok en knappe Johr in Kiel. Aver siet fast 40 Johr bün ik wedder op Dörp to finnen, in Mildstedt. So en Levensloop nennt man wull verwuttelt...

In de Frietiet lees ik geern un püttjer in de Hoff. Geern bün ik ünnerwegens, Musik, Theater, Markten, dor bün ik to finnen. En poor Johr weer ik ok in en plattdüütsche Theatergruppe aktiv.

Wat bedüüt di de plattdüütsche Spraak?

Ik bün mit Platt groot worrn un ok to School kamen. In de Realschool Viöl geev dat blots in de Ünnerricht Hochdüütsch. Un in de Spoorkass geev dat vele Plattsnacker. Överall, ob mit Kunnen, Kollegen oder ok in Arbeitsgruppen, Platt weer oft eerste Wahl. 2003 hett de Spoorkass fusioneert un mien Arbeitsplatz as Orgaminsch weer nu in Sleswig. Dor weer ik mitmal vun “Hoochdüütschen” inketelt. Dor worr mi kloor, wat dat heet, in‘n wohrsten Sinn vun´t Woort de Spraak to verleren. Un ik heff mi mehr dorför interesseert, wie man dat Plattdüütsche an´ t Leven holen kann.

Wo kriggst du hüüttodaags Plattdüütsch mit?

Privat fang ik meist eerstmol plattdüütsch an un kiek, ob mien Gegenöver dormit torechtkummt. In de Familie in mien Generatschoon warrt noch veel Platt snackt, ok de “Toheiraadten” köönt veel verstahn, wenn wi ünnernanner Platt snacken. En Generatschoon wieder is leider keen Modderspreker “Platt” mehr dorbi, aver verstahn geiht meist. Wenn teihn Cousinen op en Dutt all dörchenanner Platt snötern, is dat för dat Jungvolk schwoor. Op Dörp warrt immer noch ünner de Ölleren veel Platt snackt.

Wie hest du de Vereen kennenlehrt?

De hoochdüütschen Johren in Sleswig hebbt dorto föhrt, dat ik in de Rententiet  mehr mit Plattdüütsch maken much, geern mit Kinner. In´t Plattdüütsch Zentrum in Leck heff ik bi Gesa mal vörfraagt, wat ik dor so maken kann. Ik worr Maat in de Vereen, heff dor de Kurs “Platt för de Lütten” dörchlopen un bün hüüt in de Kinnergoorn aktiv. De Arbeit vun de Vereen funn ik ok spannend un heff geern en Vörstandsposten övernahmen.

Wat wünscht du di för de plattdüütsche Spraak?

Dat Plattdüütsch bi de jungen Lüüd mehr in Mood kummt. Denn gifft dat villicht wedder mehr Gören, de tweesprakig opwassen, wenn een vun de Öllern Platt snacken kann. Denn hören wi de plattdüütsche Spraak mehr in´t Däägliche, so ganz normal op de Speelplatz oder bi´t Footballspelen.

Un all Plattsnacker köönt ok dorför sorgen, dat Platt wedder mehr höört warrt. Nich dat de Urlauber sik umdreihen, wenn dor mol tofällig irgendwo Platt snackt warrt. Man eenfach “Rut mit de Spraak”!

Hest du en plattdüütsche „Lieblingsminsch“?

Villicht mien Mudder, se hett immer so schöne plattdüütsche Riemels maakt. Ik freu mi över all Minschen, de Spaaß an dat Plattdüütsche hebben un dat ok utleven.