Fief Fragen an Truels Hansen
He is siet 2014 de eerste Vörsitter vun unse Fördervereen. Bito hett Truels Hansen sik vele Johren in de Plattdüütsche Raat för Sleswig-Holsteen för unse Spraak un Saak insett.
Turels Hansen, 1. Vörsitter vun unse FördervereenFünf Fragen an...
In dieser Rubrik stellen sich Mitarbeitende und Wegbegleiter des Zentrums für Niederdeutsch im Landesteil Schleswig und seines Fördervereins vor.
Truels Hansen leitet als erster Vorsitzender den Förderverein.
Stell di bidde kort vör:
Ik kaam ut Hollingstedt an de Treen un bün in Viöl groot worrn. Imtwüschen Rentner heff ik vele Hobbies: Plattdütsch stütten, Umwelt un Natur helpen, op Jagd gahn, Jagdhorn spelen. Ik bün verheiratet, wi hebben dree Jungs un Swiegerdöchter mit totiets fief Enkelkinner.
Wat bedüüt di de plattdüütsche Spraak?
Plattdütsch is för mi de dääglich Spraak. Ik bün in`t Dörp mit Plattdüütsch opwussen, tohuus wurr meisttiets Hochdüütsch snackt. Mit mien Fru snack ik meisttiets Hochdüütsch, mit mien Kinner un Enkelkinner blots Plattdüütsch.
Wo kriggst du hüüt noch Plattdüütsch mit?
Överall bi uns in`t Dörp un in`t wiedere Umfeld warrt Plattdüütsch snackt.
Wie hest du de Fördervereen kennenlehrt?
To de Fördervereen bün ik 2014 över Helmut Wree kamen. Mit Plattdüütsch is man neger bi de Lüüd. Dat mutt wieder leevt warrn! Ik stütt Plattdüütsch in de Fördervereen för dat Plattdüütsch-Zentrum in Leck, weer acht Johr in de Plattdüütsche Raat för Slewig-Holsteen un bi de Lannddag in de „Beirat für Niederdeutsch“.
Wat wünscht du di för de plattdüütsche Spraak?
Noch mehr Plattdüütsch in de Kitas, in de Beroopsscholen un in de Medien (Radio, Fernsehn, Zeitung). Plattdüütsch in de Scholen is goot anlopen. Junge Lüüd för Plattdüütsch övertügen.
Hest du en plattdüütschen „Lieblingsminschen“?
Ik freu mi över all Lüüd, de in en föhrende Positschoon stahn un mit all Lüüd ganz eenfach Plattdüütsch snacken!