Stell di bidde kort vör:

Ik kaam ut Haußmoor in de Kreis Rendsborg-Eckernföör, dat is heel bekannt för dat Tractor Pulling, wat jümmerto Pingstmondag stattfinnen deit. Middewiel wahn ik in Osterrönfeld, dat liggt an’n Nord-Ostsee-Kanal, dor bün ik ok Grundschoollehrer un ünnerricht dor Mathe, Sachünnerricht un Plattdüütsch.

Över de Landjugend bün ik to dat plattdüütsche Theater kamen. Ik bün Liddmaat bi de Nedderdüütsche Bühn Niemünster un de Friewillige Füerwehr in Haßmoor. Ik versöök jüst dat Spelen vun de Gitarr to lehren.

Wat bedüüt di de plattdüütsche Spraak?

Plattdüütsch bedüüt för mi Modderspraak un Tohuus. Ik snack dat mit mien Familie un denk op Platt bet hüüt.

Wo kriggst du hüüttodaags Plattdüütsch mit?

Ik denk op Platt un wenn ik maark, dat mi dat üm mi rüm en Tiet lang to Hoochdüütsch warrt, denn fohr ik geern mol wedder na mien Familie, wo ik mol wedder vertruut Platt snacken kann.

Ik frei mi ok, dat in mien Beroop mit intobringen, wo ik männigmol mien Schölers plattdüütsche Snacks vertell.

Wie hest du de Vereen kennenlehrt?

Ik heff dat Plattdüütsch Zentrum al as Student in Flensborg kennenlehrt un heff dat in all de Johren as faste Anloopsteed för plattdüütsche Belang jümmers wedder opsöcht.

Besünners in’n Kopp is mi dat platt-drift-barcamp bleven, wo sik Plattsnackers ut verschedenen Rebeten mit bannig Drift kennenlehrt hebbt.

Wat wünscht du di för de plattdüütsche Spraak?

Ik wünsch mi, dat Plattsnackers de Mööglichkeit geven warrt, wo se mitenanner in Uttuusch gahn köönt un sik op Platt över ehr Gedanken ünnerhoolt.