Stell di bidde kort vör:

• Wo kummst du her? Ut Angeln. To Welt kamen bün ik in Toestrup (wokeen dat nich kennt: Dat is en Siedlung in’t Amt Kappeln-Land: Een Kark, een Pastorat, een Gasthuus, veer Hüüser un dree Spitzbuben.
• Wo büst du groot worrn? In Mehlby, op Wilhelminenhöh un in Wittkiel; also rund üm Kappeln.
• Wat maakst du? Mien Profeschoon is „Verwaltungsfachangestellter“, ik bün ‚Kassenverwalter‘ un heff dat ‚Leit vun de Villstreckbehöörd‘ bi’t Amt Geltinger Bucht. Man ik heff en ‚grundsolide berufliche Fundamt‘: Lehrt heff ik in de Landwirtschop, bün achteran to Landwirtschopsschool na Kappeln bi Dr. Bohne gahn un weer dornah en poor Johr lang in Neddersassen op Melkveeh-Bedrieven anstellt. Siet 1990 hett sik dann allens ännert…
• Hest du Familie? Ja! Mit mien Annika bün ik siet 2001 verheiraadt un wi hebbt twee Döchter: Merrit (23) un Levke (21)
• Wat deist du geern? (Hobby un Kraam) Dor geiht dat al los… Siet 1993 bün ik bi de ‚Kappelner Kummedianten‘ dorbi; dormals weer dat noch de „Laienspeelgruppe (en Anhängsel) vun de Volkshochschool Kappeln“. Vele Johren heff ik mitspelen un mitwarken dorvt; nu heff ik de grote Ehr, dat ik as Vörsitter de Vereen ‚De Kappelner Kummedianten e.V.‘ vörstahn un de Geschicke – tosamen mit „De twete Mann“ (un mien Theoter-Kollegin) Marion Lorenzen– leiden dörv. Aver dat is noch nich allens: To geern bün ik in „mien geliebte Außenwirtschaft“ buten in de Goorn un op de Hoffplatz togang. Un opto maak ik in de Winter ok geern unse Füerholt sülven; bün denn mit min 24-er Deutz un de lütte JF-AV-25 ünnerwegens… Un: Ik hool veel vun gode Naverschop un geev mi Möög, de in en gesellige Rahmen to holen.

Wat bedüüt di de plattdüütsche Spraak?

• Büst du dormit opwussen? JA un NEE! Mien Öllern hebbt mit mi un mit mien Geschwister keen Plattdüütsch snackt. Aver in dat landwirtschopliche Ãœmfeld, in dat ik mi all jümmers beweegt heff, is mi Plattdüütsch so ganz nevenbi mitgeven worrn.
• Kannst du Platt verstahn oder sogor snacken? Ik snack platt, jümmers wenn de Situatschoon dat hergifft!
• Snackst du Tohuus ok Platt in’e Familie? Mitünner mit mien Modder un mit mien Swiegermodder; ansonsten: Nee, dat do ik nich, allenfalls mit uns Döchter, an’n ehesten noch mit uns Dochter Merrit; ik hool eer för „plattdüütsch-affin“…(Merrit kunn ik 2019 begeistern, bi ‚De Kappelner Kummedianten‘ in en Rull bi „Pension Schöller“ mittomaken; se hett dat ok wirklich goot henkreegen -ok dat Plattdüütsche– un se wiese ok würklich en gode Bühnenpräsenz… man leider… blots bi de Proven… denn keem unmiddelbor vör de Premiere ‚CORONA‘ (vun HUNNERT rünner op NULL); leider is se nu nich mehr dorbi; se is in’t Studium…

Wo kriggst du hüüttodaags Plattdüütsch mit?

In de Gemeende beed ik foorts geern Plattdüütsch an, wenn ik maark, dat Lüüd plattdüütsch-togänglich sünd; in de Naverschop un bi’t Theater, kloor.

Wie hest du de Vereen kennenlehrt?

• Kenntnis vun de Vereen harr ik al länger. Man würklich dor to kamen bün ik över Gesa Retzlaff un över Erich Petersen; Erich hett mi so’n beten an de Hand nahmen…
• Un worüm engageerst du di jüst dor? Dat Plattdüütsche is dat würklich weert, dat man sik dorför engageert. Dat is jo letztenns ok mien Heimatspraak: Wi hebbt en Tiet beleevt, in de Plattdüütsch ‚verpönt‘ weer. Un dat weer verkehrt. Nu bün ik de Laag, to hölpen, dat sik dat wedder ännert.
• Hest du en besünnere Rebeet, för dat du di stark maken deist? Na ja… Mien Profeschoon bringt dat al mit sik, dat ik mööglicherwies goot op dat Finanz-Rechtliche kieken kann. (Jedereen kann jichtenswat…) Dorüm heff ik denn ok jichtenswenn JO seggt, op de Fraag, wat ik mi nich vörstellen kunn, de Finanzbaas vun de Vereen Plattdüütsch Zentrum to spelen. Mööglicherwies kann ik hier hölpen, de Ziele un dat Wüllen vun unse Vereen to realiseren!

Wat wünscht du di för de plattdüütsche Spraak?

• Wat mutt noch beter warrn? Dat Torüchbesinnen vun un in de Gesellschop op unse Modderspraak!
• Wat löppt al allerbest na dien Menen? De Akschoon „Rut mit de Spraak!“ De finn ik so dull un freu mi jedet Mal, wenn ik en lütte ansteckte „p“ sehen do oder wenn ik de Werbekampagne vun unse Vereen beleven dörv.
• Wo wüllst du geern mitmischen? Noch mehr (mitmischen)? Nu langt dat aver! Nee, also ehrlich: Jeedeen mutt weten, wann he an sien ‚Belastungssgrenze‘ ankamen is. Un wenn een ehrenamtlich to veel maakt, dann löppt dat männichmal dorop rut, dat dat nich mehr ördentlich warrt. Dat much ik geern ut de Weg gahn. Kort un knapp: Projektarbeit: JA; mehr Ehrenämter: NEE!

Hest du en plattdüütsche „Lieblingsminsch“?

So, nu warrt dat eernst! Ja, dat heff ik, oder ja, dat harr ik: In mien landwirtschopliche Lehrtiet 1984/1985, dor weer ik in Lottörp, dat is bi Jagel, süden vun Sleswig. De Buersfru hett meisttiets plattdüütsch mit uns Lehrlinge snackt. Ik heff veel mit ehr tosamen arbeidt, bi’t Melken to’n Bispeel. Un se harr so’n besunnere plattdüütsche Mundoort, vun de Sleswiger Westen, se keem börtig ut Meggerdörp/Groot Rheid. Vun ehr heff ik veel lehrt, nich blots Praktisches, ok veel Minschliches. Ik heff ehr, de jümmer so bescheden weer, bewunnert un ehrt. Wi hebbt de Kontakt över all de Johren oprecht holen un wi hebbt jümmer Plattdüütsch mitenanner snackt. Nu is Christa in de Mai 2025 in hoge Öller storven un se fehlt mi en beten…