Stell di bidde kort vör:

Ik bün Alina Dwenger un kaam ut en lütte Dörp, in dat ik vun lütt an opwussen bün un hüttodags uk immer noch mit mien Familie wahn. Totiets studeer ik un heff twee Nevenjobs. Ik speel för mien Leben geern plattdüütsche Theater, gah geern to’n Danzen un mag geern kreativ warrn, mit Stoff oder Papeer.

Wat bedüüt di de Plattdütsche Spraak?

Ik bün mit Plattdütsch groot worrn un kann dat astrein verstahn un uk snacken. Mit mien Familie un uk mit Frünnen un Arbeitskollegen ünnerhool ik mi an‘n leevsten op Platt.

Wo kriggst du hüüt noch Plattdüütsch mit?

De plattdüütsche Spraak höör ik so teemlich överall ‘n beten rut! Ob dat bi‘t Inköpen is oder in de Kroog, egal wo, man finnt immer een, de Platt snackt.

Wie hest du de Fördervereen kennenlehrt?

To de Fördervereen keem ik dörch Truels Hansen, de mi ansnacken dee, ob ik nich Lust harr mittomaken. Ik freu mi bannig, Mitglied in de Vörstand to ween. Dat is en grode Chance wat to doon, um de plattdüütsche Spraak to erholen, un um „vörne“ mittomischen.

Wat wünscht du di för de plattdütsche Spraak?

Dormit de plattdütsche Spraak ünner de Lüüd blifft, finn ik dat grootoordig, wenn wi jungen Lüüd dat Plattdüütsche an unse Kinner wiedergeven doon bzw. warrn. Denn warrn de Kinner, so as ik, sülvstverständlich dormit groot un dat Plattdüütsche denn deren Mudderspraak!

Hest du en plattdütschen „Lieblingsminschen“?

En plattdütschen Lieblingsminschen heff ik nich, besunners geern snack ik aver mit mien Frünnen op Platt!